Հայաստանում սպառողական գները շարունակում են աճել։ Աճի չափն ինքնին կարող է թվալ ոչ այնքան էական, սակայն տպավորիչ է այն հանգամանքը, որ թանկացման գործընթացը ընդգրկել է գործնականում ամեն ինչ։
ՀՀ վիճակագրական կոմիտեի տվյալների համաձայն, ընթացիկ տարվա հոկտեմբերին՝ նախորդ տարվա հոկտեմբերի համեմատ, սպառողական գները աճել են 3,7%-ով։ Այս աճը, սակայն, ոչ թե միանգամյա երևույթ է, այլ միտում, որն ամիս ամիս աճում է։ Եթե հունվարին տարեկան աճը կազմել է 1,7%, ապա փետրվարին այն արդեն 2,5%, մարտին՝ 3,3% էր, և այսպես շարունակ։ Այսպիսով, խոսքը միտման մասին է, որը բացասական և մտահոգիչ է միջին վիճակագրական սպառողի համար։ Գների աճի դինամիկայի փոփոխության նշաններ չկան, և հիմքեր չկան ենթադրելու, թե այս գործընթացը կարող է կանգ առնել։
Այս համապարփակ աճի մասին խորքային վերլուծություն կատարելիս պետք է նշել, որ բարձրացել են ապրանքների և ծառայությունների գերակշիռ մասի գները։ Ընդհանուր առմամբ ուսումնասիրվել են 426 անուն ապրանքների և ծառայությունների գները։ Դրանցից միայն 144-ի գինը չի աճել։ Այսինքն՝ բոլոր ապրանքների և ծառայությունների միայն մեկ երրորդը չի թանկացել։ Դրանցից միայն 51-ի պարագայում է արձանագրվել գների նվազում, մնացած բոլորի դեպքում փոփոխություններ չեն հայտնաբերվել։ Էժանացած ապրանքների և ծառայությունների առավելագույն քանակը բաժին է ընկնում կենցաղային իրերին, կահույքին և կենցաղային տեխնիկային։ Կարևոր է նշել, որ խոսքը վերաբերում է գների չնչին իջեցմանը՝ մեկ-երկու կամ տասը տոկոսով։ Ամենից էական նվազումը հեղուկ գազի գնի 15%-անոց անկումն է, որը հոկտեմբերին էժանացել է։ Այս հանգամանքը կարելի է համարել երկարաժամկետ դրական միտում, քանի որ այն համապատասխանում է երկրի տրանսպորտային պարկի էլեկտրաֆիկացման ակտիվացման ընթացքին։
Ինչ վերաբերում է գների աճին, ապա գործնականում ամեն ինչ թանկացել է սննդամթերքի ոլորտում։ Պարենային բոլոր ապրանքներից մի փոքր նվազել է միայն բրնձի, կարտոֆիլի, մրգերի, ձեթի և նախաճաշի շիլաների գինը։ Կարագ, միս, ձուկ, բանջարեղեն, հաց. բոլոր այս մթերքները հոկտեմբերին թանկացել են։
Այսպիսով, իշխանության ներկայացուցիչների կողմից հանրությանը ներկայացված այն թեզը, թե 2018 թվականից հետո Հայաստանում կյանքի որակը բարելավվել է, ամիս ամիս հերքվում է։ Սպառողական գների, և հատկապես հիմնական ապրանքների գների աճի բարձր տեմպերի ֆոնին քաղաքացիների սոցիալական վիճակը սրընթաց վատանում է։ Իհարկե, ոմանց կյանքը նույնքան սրընթաց բարելավվում է, սակայն երկրի քաղաքացիների ճնշող մեծամասնության, նրանց համար, ում եկամուտները բացարձակապես չեն աճում, կյանքը գնալով թանկանում է։ Իսկ ինչպես հայտնի է, միշտ չէ, որ ավելի թանկը նշանակում է՝ ավելի լավը…
